Text Box: Jane Hutt AC Y Gweinidog Cyllid a Busnes y Llywodraeth

 

2 Tachwedd 2015

 

Annwyl Weinidog

Cyllideb Ddrafft Llywodraeth Cymru ar gyfer 2016-17

Hoffwn eich gwahodd i gyfarfod o'r Pwyllgor ddydd Iau 21 Ionawr 2016 i roi tystiolaeth mewn cysylltiad â chyllideb ddrafft Llywodraeth Cymru ar gyfer 2016-17.

Disgwylir i'r sesiwn dystiolaeth bara tri chwarter awr, gan ddechrau am 9.00.   Cynhelir y cyfarfod yn Ystafell Bwyllgora 2 yng Nghynulliad Cenedlaethol Cymru ym Mae Caerdydd.  Byddai'n ddefnyddiol pe gallech ddarparu papur dwyieithog i'r Pwyllgor mewn perthynas â'r gyllideb ddrafft erbyn dydd Mercher 6 Ionawr.  Byddai'r Pwyllgor yn arbennig o ddiolchgar o gael gwybodaeth am y materion cyllidebol a amlygir yn yr atodiad i'r llythyr hwn.

Yn gywir

Christine Chapman AC

Cadeirydd

 

Atodiad

Yn ystod y broses o graffu ar y gyllideb ddrafft yn ystod y blynyddoedd diwethaf, croesawodd y Pwyllgor y gwelliannau a wnaed i gyflwyniad ac eglurder dogfennau cyllideb Llywodraeth Cymru a'r papurau a gyflwynwyd i Bwyllgorau'r Cynulliad gan Weinidogion a Dirprwy Weinidogion. 

Yn ogystal, mae'r Pwyllgor eisoes wedi croesawu'r gwelliannau a wnaed i'r broses o asesu effaith y gyllideb ar gydraddoldeb, ac yn benodol y cam o sefydlu Grŵp Cynghorol y Gyllideb ar Gydraddoldeb a'r ymchwiliad gwerthfawrogol a wnaed gan y Comisiwn Cydraddoldeb a Hawliau Dynol i'r broses yr asesiad o'r effaith ar gydraddoldeb. 

Mae'r Pwyllgor yn cydnabod nad oes gan y Gweinidog Cyllid gyfrifoldeb cyffredinol dros gydraddoldeb. Fodd bynnag, cred y Pwyllgor ei bod yn bwysig fod y Gweinidog yn darparu gwybodaeth am sut y mae cydraddoldeb yn cael ei ystyried yn y broses gyffredinol o lunio cyllideb ddrafft.

Yn benodol, hoffai'r Pwyllgor gael gwybodaeth am y materion a ganlyn:

·         gwaith Grŵp Cynghorol y Gyllideb ar Gydraddoldeb a pha ddylanwad y mae  wedi'i gael dros benderfyniadau cyllidebol;

·         enghreifftiau o sut y defnyddiwyd yr asesiad o'r effaith ar gydraddoldeb yn ystod y broses o gynllunio'r gyllideb;

·         y dull integredig o asesu effeithiau'r gyllideb ar gydraddoldeb a chynaliadwyedd;

·         y dystiolaeth a ddefnyddiwyd i asesu effaith penderfyniadau cyllidebol ar gydraddoldeb.